Metabolic

Metabolic er hópaþjálfun þar sem megin áherslan er á fjölbreyttar æfingar sem skila markvissum árangri. Kerfið gengur í fjögurra vikna ákefðarbylgjum og er byggt á vísindalegum grunni svo engar tilviljanir eru í æfingavali eða tímasetningum. Tímabilið skiptist því í fjórar vikur þar sem vika eitt er auðveldust og vika fjögur erfiðust. Okkar helsta markmið er að iðkendur læri að hreyfa sig af öryggi, hafi gaman að æfingunum og hlakki til að mæta aftur.

Kerfið er sett upp þannig að iðkendur geta alltaf valið um þrjú erfiðleikastig af æfingu dagsins. Þannig geta iðkendur alltaf fundið hvað hentar best hverju sinni. Hver tími er aldrei lengri en 45 mínútur. Það er, með upphitun í upphafi tímans og „finisher“ eða teygjum í lokin. Tímarnir skiptast í mismunandi grunnáherslur til að iðkendur fái þjálfun fyrir öll sín orkukerfi og gerir þjálfunina því enn nákvæmari. Í öllum skipulögðum hópatímum er alltaf þjálfari sem leiðir upphitun, útskýrir æfingu dagsins og er til staðar allan tímann.

Sama hvaða eriðleikastig þú velur eða hvaða viku við erum stödd í þá er iðkandi alltaf við stjórnina og velur sinn hraða í öllum æfingum. Iðkandi hefur alltaf rými til að hlusta á sinn líkama og aðlaga ef þarf.

Erfiðleikastigin þrjú:

MB 1

Hér vinnum við aðallega með eigin líkamsþyngd eða teygjur. Einbeitum okkur að því að læra æfingarnar og beita okkur rétt áður en við færum okkur í MB 2. Þetta erfiðleikastig hentar vel fyrir byrjendur eða þá sem vilja ekki nota lóð.

MB 2

Hér erum við að vinna með svipaðar æfingar og í MB 1 nema bætum við handlóðum, ketilbjöllum og yfirleitt aðeins meira krefjandi útgáfur af æfingunum. Fyrir byrjendur er sniðugt að byrja rólega að prófa MB 2 æfingar þegar viðkomandi er búin með fyrstu fjórar vikurnar í MB 1.

MB 3

Í MB 3 erum við að vinna með flóknari samsetningar af æfingum og oft tæknilega erfiðari. Hér notum við mikið lóðastangir, upphífingastöng, ketilbjöllur, handlóð í bland við erfiðari þol- og snerpuæfingar. Við getum prófað MB 3 þegar okkur líður vel í MB 2 og viljum fá meira út úr æfingunni.

Grunnáherslurnar fjórar:

Metabolic – Strength

Metabolic Strength er tími sem leggur áherslu á styrk og uppbyggingu vöðva. Vinnum hægar, einbeitum okkur að tækni og að læra að tengja við rétta vöðva. Fyrir þá sem velja MB 2-3 í þessum tímum hvetjum við til að velja krefjandi þyngdir. Þetta eru tímarnir sem við viljum til að verða sterkari.

Metabolic – Power

Power tímarnir snúast um kraft og snerpu. Hér er tímaramminn yfirleitt stuttur og hvíldin lengri til að þjálfa hraða. Þá viljum við vinna hverja endurtekningu eins hratt og örugglega og við getum. Þessir tímar rífa púlsinn vel upp en hér erum við frekar á hámarkspúls í stuttan tíma en fáum svo nógu langa hvíld á milli til að jafna okkur á milli.

Metabolic – Endurance

Metabolic Endurance leggur áherslu á þol. Þessir tímar eru mjög mikilvægir í bland við hina því hér erum við að rífa upp púlsinn en það er eitt það besta sem við gerum fyrir hjarta- og æðakerfið. Markmiðið okkar í þessum tímum er að halda út tímann og því er lykilatriði að vinna hægt en í langan tíma. Þessir tímar eru snilld til að auka úthald.

Metabolic – Burn

Burn er blanda af styrktaræfingum og þolæfingum. Þetta eru oft erfiðustu tímarnir því við erum að vinna lengur í einu. Þessir tímar auka bæði úthald vöðva og þol.

Aðrir tímar í töflu:

Lyftingar // Þungir Miðvikudagar

Allir tímar á miðvikudögum eru lyftingatímar. Þá förum við vel í grunninn hvernig á að beita sér með lóðin, stangirnar, rekkana og bekkina. Lærum í raun að lyfta frá grunni. Þessir tímar eru mjög góðir fyrir þá sem vilja rólegri tíma og meiri leiðsögn en líka þá sem vilja bæta tæknina sína og prófa sig áfram með þyngdir.